بہاولپور۔11اگست (اے پی پی) وزیراعظم عمران خان کاشتکار طبقے کوں ملک دا ساریاں توں وݙا قیمتی اثاثہ قرار ݙیندیں ہوئیں آکھیا جو ملک دے مستقبل ، غربت اچ گھٹکی اتے خوشحالی سانڳے کاشتکاراں دی مدد اساݙا فرض اے، کسان کارڈ ہک انقلاب اے، ایں نال کاشتکاراں کوں براہ راست سبسڈی ملسی۔ کاشتکاراں دی آمدݨ اچ ودھارے نال پاکستان کوں فائدہ تھیسی، پیداوار ودھسی، قیمتاں گھٹ ویسن۔ او بدھ کوں کسان کنونشن نال خطاب کریندے پئے ہن۔ ایں موقع تے وزیراعلیٰ پنجاب عثمان بزدار، معاون خصوصی برائے غذائی تحفظ و تحقیق جمشید چیمہ وی خطاب کیتا۔ وزیراعظم ایں موقع تے کاشتکاراں اچ کسان کارڈ وی تقسیم کیتے۔ انہاں زرعی شعبے اچ تحقیق تے اسلامیہ یونیورسٹی بہاولپور دے وائس چانسلر پروفیسر ڈاکٹر اطہر اقبال، پروفیسر ڈاکٹر اقبال بندے شاہ اتے چین توں پی ایچ ڈی کرنے والے ڈاکٹر علی کوں ایوارڈ ݙتے۔ وزیراعظم تقریب نال خطاب کریندیں ہوئیں آکھیا جو 83 لکھ کسان اساݙے ملک دا قیمتی اثاثہ ہن۔ انہاں آکھیا جو ایں ویلھے ملک دی جان کسان اے، تحریک انصاف دے دور اچ ساریاں توں چنڳا کم اے تھیے جو کاشتکاراں کنے 1100 ارب روپے ودھ آڳئن، ایں توں پہلے گنے دے کاشتکاراں کوں شوگر ملز دے طاقتور ہووݨ پاروں نرخ نہ ملدا ہئی۔ ملک اچ قانون دی بجائے طاقتور دی حکمرانی رہی اے، اساں قانون پاس کیتا جو شوگر ملز کرشنگ سیزن کݙاں شروع کرݨے، جیڑھی شوگر ملز طے تھیے سیزن اچ کرشنگ سیزن شروع کائںا کریسن انہاں سانڳے سزا ہوسی۔ وزیراعظم آکھیا جو 1947ء اچ پاکستان دی آبادی چار کروڑ ہئی جیڑھی جو ودھ کراہیں ساݙھے باوی کروڑ تھی ڳئی اے، ایں تناسب نال اساݙی پیداوار وی ودھݨی چاہیدی ہئی، کنڑک دی ریکارڈ پیداوار تھیوݨ دے باوجود اساکوں 40 لکھ ٹن کنڑک درآمد کیتی۔ وزیراعظم آکھیا جو پاکستان دی تاریخ اچ ساریاں توں ودھ موٹرسائیکل وکین، ٹیوٹا گاݙیاں وکین، ایں دا مطلب اے جو ملک ترقی کریندا پئے۔ اساں ملک کوں اوکھ توں کݙھ تے استحکام آلے پاسے ڳھن آئیسے اتے ہݨ ملک ترقی کریندا پئے۔ وزیراعظم آکھیاجو کساناں کوں یقین ݙویندوں جو تساݙی مدد اساݙا فرض اے، اساں آپݨے ملک دے مستقبل، غربت اچ گھٹکی اتے خوشحالی سانڳے تساݙی مدد کریسوں، اساݙی حکومت ہر اوکھ اچ کاشتکاراں نال کھڑی اے۔
.jpg)
