مہمند ۔ 9 مارچ (اے پی پی) وزیر اعظم عمران خان آکھیا جو پوری پاکستانی قوم مقبوضہ کشمیر دے دلیر مسلماناں نال کھڑی اے،اساڈی حکومت ملکی نظام ٹھیک کرنڑ شروع کر ڈتے،اوکھے ویلھے توں لنگھ آیوں،ہنڑ چنگا ویلھا امسی،مہانگ تے قابو پاگھدے،ذخیرہ اندوزی کر تے پیسہ کماونڑ آلیاں کائنا چھڑیسوں،کجھ وی ہوونجے بجلی گیس دے نرخ کائنا ودھنڑ ڈیسوں اتے گھٹ کریسوں،عوام کڈاہیں وی ایجھی پارٹی کوں ووٹ نہ ڈیون جنہاں دے باہرلے ملکاں اچ محلات اتے اکاﺅنٹس ہوون،ساریاں دا سارا ٹبر باہر بیٹھے،چوری نہ کرنڑ آلیا ں کوں لندن بھجنڑ دی لوڑھ کائنی ہوندی،افغانستان نال تجارت سانگے سرحد کھولی ویسی،افغانستان اچ امن معاہدے دی کامیابی سانگے دعا کریندوں،قبائلی عوام سانگے موقع بنڑاونڑ اساڈا کم اے تانجو پچھوں رہنڑ آلے ضلعیاں کوں وی ترقی دی بھج دھرک اچ رلایا ونج سگدے،مہمنڈ ڈیم توں پیونڑ دا پانڑی ڈتا ویسی،اتھاں ماربل دی انڈسٹریل سٹیٹ بنڑیسوں تانجو مقامی لوکاں کوں روزگار دے موقع ملن۔اے گالھیں انہاں سنوار کوں احساس کفالت پروگرام بارے اتھاں تھیونڑآلی عوامی کٹھ نال خطاب کریندیں ہوئیں آکھی۔وزیراعظم عمران خان احساس کفالت پروگرام دے تحت کفالت کارڈ وی ونڈیے۔ایں موقع تے وزیر اعلیٰ خیبر پختونخوا محمود خان اتے وزیر دفاع پرویز خٹک، وفاقی وزیر مذہبی امور نور الحق قادری، وزیر اعظم دی معاون ڈاکٹر ثانیہ نشتر وی موجود ہن۔وزیراعظم عمران خان شاندار استقبال تے مہمند دی عوام دا شکریہ ادا کیتا۔وزیراعظم ایں موقع تے مقبوضہ کشمیر دی عوام دی قربانیاں کوں خراج تحسین پیش کیتا جنہاں کوں ست مہینے توں بھارتی فوج گھراں اچ نظر بند کر رکھیے۔وزیراعظم مقبوضہ کشمیر دے دلیر مسلماناں کوں سنھیا ڈتا جو پوری پاکستان قوم انہاں نال کھڑی اے۔انہاں آکھیا جو اوکھے ویلھے صبر کرنڑ آلے کوں اللہ تعالیٰ بہترین صفت قرار ڈتے۔انہاں آکھیا جو اساں مقبوضہ کشمیر دے مسلماناں سانگے دعا کریندوں جو اللہ انہاں کوں صبر دی توفیق ڈیوے۔ وزیر اعظم آکھیا جو پاکستان لا الہ الا اللہ تے بنڑیا ہئی اتے ایں ملک دنیا سانگے مثال بنڑنڑے اتے اسلام دا حقیقی چہرہ پیش کرنڑاں ہئی ۔مدینہ دیریاست او ریاست اے جئیں اچ حضور نبی کریم کمزوراں،بیوہ،معذوراں،مسکیناں اتے یتیماں دی ذمہ واری ریاست کوں ڈتی ہئی ۔پاکستان دی فلاحی ریاست دا وی ایہو نظریہ ہئی ۔اساں ایں رول ماڈل کوں نافذ کریندے پیوں۔
