اسلام آباد۔11دسمبر(اے پی پی)اسلامی تعاون تنظیم (او آئی سی ) دے سیکرٹری جنرل حسین براہیم طحہٰ آکھیے جو مسئلہ کشمیر او سی آئی دی ترجیحات دا حصہ اے، رکن ملکاں کوں کشمیر دی صورتحال ݙسیسوں، مسئلہ کشمیر دا پرامن حل ڳولݨ دی کوشش اچ ہیں، ڄڳ دی توجہ ایں مسلے تے ݙیواوݨ لو ہی کشمیر دے دورے تے آیاں۔ اے ڳالھ انہاں آزاد جموں و کمشیر دے دورہ ویلھے مظفر آباد اچ صدر آزاد کشمیر بیرسٹر سلطان محمود چوہدری دے کٹھے پریس کانفرنس اچ آکھی۔ انہاں آکھیا جو مسئلہ کشمیر حل کراواݨ ساݙی ذمہ واری اے، اڄ اتھاں ساری صورتحال اپݨی اکھیں نال ݙیکھݨ آیاں، بھارتی افواج دے مظالم نال متاثرہ لوکاں نال ملیاں، ساݙا کردار او آئی سی دے رکن ممالک کوں مقبوضہ کشمیر دی صورتحال ݙساوݨ اے۔ ایں موقع تے آزاد جموں و کشمیر دے صدر بیرسٹر سلطان محمود چوہدری آکھیے جو اڄ دا ݙینھ کشمیریاں کیتے ہک وݙا ݙینھ اے، سیکرٹری جنرل او آئی سی حسین براہیم طحہٰ دی اڳواݨی اچ او آئی سی وفد دا دورہ آزاد جموں و کشمیر مسئلہ کشمیر دے حل کیتے ہک وݙی اڳونہی اے، ایندے نال کشمیریاں دے حوصلے ٻئے تکڑے تھیسن، اے دورہ بھارتی ظلم دا شکار کشمیریاں نال یکجہتی دا ثبوت اے۔ ایں توں پہلے او آئی سی دے سیکرٹری جنرل لائن آف کنٹرول دے علاقیاں، مہاجر کیمپاں دا وی دورہ کیتے۔
